Олунньу 12 күнүгэр Мэҥэ Хаҥалас улууһун 1-кы Наахара нэһилиэгэр Сахабыт сирин ситэриилээх былаас уорганнарын ааспыт 2024 сыл түмүктэрин отчуоттуур мунньаҕа ыытылынна.
Отчуоттуур бөлөххө Саха Өрөспүүбүлүкэтин тыатын хаһаайыстыбатын миниистирин солбуйааччыта Николай Степанович Афанасьев, доруобуйа харыстабылын миниистирин солбуйааччыта Надежда Тимофеевна Федорова, култуураҕа уонна духовнай сайдыыга министерствотын отделын салайааччытын солбуйааччыта Майя Михайловна Ермолаева, ону тэҥэ Саха Өрөспүүбүлүкэтин бырабытыылыстыбатын араас хайысхаҕа эппиэттээх үлэһиттэрэ нэһилиэнньэни кытары көрүстүлэр.
Маны тэҥэ, отчуокка улууспут депутаттарын сэбиэтин бэрэссэдээтэлэ Иннокентий Иннокентьевич Андросов, улууспут баһылыгын бастакы солбуйааччыта Василий Васильевич Михайлов, экономикаҕа управлениятын салайааччыта Екатерина Андреевна Павлова уонна да атын управлениялар салайааччылара, үлэһиттэрэ кыттыыны ыллылар.
Бөлөх салайааччыта Саха Өрөспүүбүлүкэтин тыатын хаһаайыстыбатын миниистирин солбуйааччыта Николай Степанович Афанасьев өрөспүүбүлүкэ ситэриилээх былааһын 2024 сыллааҕы үлэтин экраҥҥа көстөр чахчыларга олоҕуран сиһилии сырдатта.
2024 сыл түмүгүнэн, биһиги нэһилиэккэ балай да элбэх үлэ барбытын эттилэр. Ол курдук, олохтоох көҕүлээһини өйөөн 113 кэтэх хаһаайыстыбаҕа 5000000 солкуобай сууммалаах сайыҥҥы өттүгэр уу кэлэр провода тардыллыбыта. Бүтүн Арассыыйатааҕы кыра нэһилиэктэргэ түргэн интернет ситимэ киирэр куонкурсугар кыттан 2 миэстэҕэ тахсан, бу хайысхаҕа үлэ ыытыллара күүтүллэр. Маны таһынан, С.И. Борисова аатынан култуура дьиэтигэр 1600000 солкуобай сууммаҕа ЛЕД экран кэлэн турда. Олохтоох ФАП-ка аптека пууна арылынна. ИП Данилова тыа хаһаайыстыбатын агро программатын чэрчитинэн Саха Өрөспүүбүлүкэтин гранын ылан 50 миэстэлээх хотон тутуутун саҕалыахтаах. Маны тэҥэ, эбии Мэҥэ Хаҥалас тыа хаһаайыстыбатын ынах-сүөһүнү эбии аһатыыга гранын ылан Уулуссан диэн сиргэ күөх үүнээйини ыһаары бэлэмнэнэр.
Мунньах түмүгэр отчуоттуур бөлөх кыттыылаахтара олохтоохтор ыйытыыларыгар хоруйдары, быһаарыылары биэрдилэр. Ол курдук, олохтоохтор нэһилиэккэ ыччат, оҕо дьарыктанарыгар, үөрэнэригэр саҥа оскуола, спорт саала, эдэр специалистарга олорор дьиэ тутуутун, суолу оҥоруу, уунан хааччыллыы, Хомпу үрэххэ быһыт оҥоруу, уу хаачыстыбатын бэрэбиэркэлэтии, кытыы сытар нэһилиэктэргэ болҕомто ууруу, манна сөптөөх бырагыраама оҥорон үлэни тэрийии, тыа хаһаайыстыбата сайдыытын боппуруостарын ыйыттылар, санааларын эттилэр.
Киирбит этиилэри мунньах боротокуолугар киллэрэн, инники үлэ былааныгар учуоттуулларгар баҕа санааларын тиэртилэр.
Тускулаана Никитина, 7 кылаас,
Амелия Захарова, 8 кылаас,
А.А.Пахомов аатынан Тиэлиги орто оскуолатын үөрэнээччилэрэ, «Хомпу» медиакиин эдэр корреспонденнара, Мэҥэ Хаҥалас