Бу күннэргэ Саха Өрөспүүбүлүкэтин баһылыга Айсен Николаев Дьокуускай куорат 2032 сылга диэри сайдыытын туһунан ыйаахха илии баттаата.
«Дьокуускайга өрөспүүбүлүкэ нэһилиэнньэтин үс гыммыт биирэ олорор уонна үлэлиир. Биһиги сүрүн сыалбыт — дьоҥҥо олорорго табыгастаах усулуобуйаны оҥоруу, дьоллоох буолалларыгар кыһаллыахтаахпыт», — диэн Айсен Николаев иһитиннэрдэ.
Ил Дархан этэринэн, куорат 400 сылыгар анаан өрөспүүбүлүкэ киин куората толору уларыйыахтаах уонна «ирбэт тоҥ сиригэр тутуллубут аан дойдуга бастыҥ куората буолуохтаах» диэн тоһоҕолоон бэлиэтээтэ.
Манна Татьяна Семеновна Винокурова, Ф.И. Авдеева аатынан Дьокуускай куораттааҕы Оҕо айымньытын дыбарыаһын дириэктэри үөрэх чааһыгар солбуйааччы, тус санаатын кытары үллэстэр:
— Бу 2032 сылга диэри биһиги дойдубут киин куората Дьокуускай сайдарын туһунан Ил Дархан Айсен Сергеевич Николаев ыйааҕын өрөспүүбүлүкэбит олохтоохторо үгүстэрэ биһирээбит буолуохтаахтар. Мин үөрэх эйгэтигэр үлэлиир киһи уонна төрөппүт буоларым быһыытынан, бастатан туран, оҕо үөрэҕин тэрилтэлэригэр эбии миэстэ баар буоларын, ол курдук, уһуйааннарга 5000 миэстэ, оскуолаларга — 17 тыһ. эбии миэстэ көрүллэрин биһирээтим. Ол курдук биһиги, үөрэх тэрилтэлэрин үлэһиттэрэ, оскуолаҕа миэстэ тиийбэккэ, ханнык да СанПин миэрэтэ тутуһуллубакка, кып-кыараҕас кылаастарга оҕолорбут элбэх буолан үөрэнэ олороллорун бары бэркэ диэн билэбит. Аны эбии миэстэ таҕыстаҕына, оскуолаҕа үөрэх хаачыстыбата эмиэ үрдүүр кэскиллээх. Аны үөрэх тэрилтэлэрин капитальнай өрөмүөнүн туһунан эмиэ биһирии иһиттибит. Кырдьык даҕаны, биһиэхэ Сэбиэскэй кэмҥэ тутуллубут, өрөмүөҥҥэ наадыйар оскуолалар, оҕо уһуйааннара элбэхтэр. Күннээҕи олохпутугар туһалаах идэлэри биэрэр орто анал үөрэх кыһаларыгар болҕомто ууруллубута эмиэ биһирэбиллээх.
Онтон Дьокуускай куорат олохтооҕун быһыытынан көрдөхпүнэ, хас биирдии микрооройуоннарга сылы быһа үлэлиир сынньанар, доруобуйаны көннөрөр, спортивнай хайысхалаах саҥа тутуулар баар буолаллара эмиэ олус хайҕаллаах. Билигин хас биирдии киһи доруобуйатын көрүнэр, спорду кытары доҕордоһор буолла, онон бу дьиэҥ аттыгар чугас турар спортивнай, сынньалаҥ кииннэр тутуллаллара олус үчүгэй дии саныыбын. Аны аҕа саастаах дьоммутугар «Уһун үйэлэнии киинэ» былааҥҥа киирбитэ эмиэ хайҕаллаах.
Аан дойду таһымыгар сөп түбэһэр, ирбэт тоҥ үрдүгэр турар бастыҥ куорат инфраструктуратын тэрийэргэ дьаһал ылыллыбыта олус сөптөөх. Хас биирдии киһи олорорго табыгастаах, бары өттүнэн эппиэттиир, тупсаҕай киин сиргэ олоруон баҕарар. Сүрүн алта хайысханан былаан турбута олус наадалаах дии саныыбын, хас биирдии олохтоох кыһалҕатын көрөн-истэн, сыаналаан, бу ылыллыбыт дьаһаллар олоххо киирдэхтэринэ, биһиги, куорат олохтоохторо, эрэ буолбакка, бүтүн өрөспүүбүлүкэбит олохтоохторо, атын эригийиэн, тас дойдулар ыалдьыттара, туристара кэлэннэр, «тыйыс усулуобуйалаах куорат маннык буолуон сөп эбит» диэн сөҕө-махтайа этэллэрин курдук тэрийэн таһаарарбыт буоллар, олус үчүгэй буолуо этэ.
Бэлэмнээтэ Анна СЛЕПЦОВА.