2017 сыл Россияҕа Экология сылынан биллэриллибитэ. Онон сибээстээн «Кэскил» хаһыат тохсунньу 3 күнүгэр «Таптаа төрөөбүт дойдугун, араҥаччылаа аар айылҕаҕын» диэн куонкуруһу биллэрбитэ. Ыытыллар болдьоҕо олунньуттан балаҕан ыйын 10 күнүгэр диэри этэ. Ити кэм устата оҕолор кылааһынан (бөлөҕүнэн) экологияҕа туһуламмыт үлэлэри ыытан, ону хаартыскаҕа түһэрэн, отчуот суруйан, биһиэхэ ыытыахтара.
Барыта 14 кылаастан (бөлөхтөн) сайаапка киирбитэ. Ол эбэтэр өрөспүбүүлүкэбит араас муннугуттан 109 үөрэнээччи кытынна.
Сыл устата саамай элбэх үлэни ыытан, ол туһунан хаһыакка тиһигин быспакка сырдатан, Чурапчы улууһун Мугудай Д.Д. Красильников аатынан оскуолатын «Ыллык» экологическай-историческай түмсүүтэ (сал. С.Б. Васильева, А.Ф. Ноговицына) кыайыылаах таҕыста. Балаһыанньа быһыытынан, бастаабыттар бөлөҕүнэн бука бары (ол эбэтэр сайаапка биэрбит 15 оҕо) «Сосновый бор» лааҕырга сынньанар чиэскэ тиксэллэр.
Иккис, үһүс миэстэ диэни таһаарбатыбыт. Тэҥ соҕус үлэни ыыппыккытынан, кими да чорбоппотубут.
Ол оннугар Орто Халыма Өлөөкө Күөлүн алтыстарыгар (сал. И.Е. Ноговицына), Ленскэй улууһун Орто Наахаратын бөлөҕөр (сал. М.Е. Колосова), Горнай улууһун Маҕарас сэттистэригэр (сал. Д.Д. Дьячковская), Нам улууһун Хамаҕатта саха-француз лиссиэйин VI «А»-ларыгар (сал. А.Н. Шелковникова) – түөрт кылааска барыларыгар 2-лии путевканы «Сосновый бор» лааҕырга биэрэбит.
Ону сэргэ биирдии путевканан наҕараадаланаллар – Үөһээ Бүлүү улууһун Ороһу оскуолатын VIII кылаастара (сал. С.П. Адамова), Дьааҥы улууһун Эҥэ (VIII кыл.)уонна Баатаҕай (VI «А» кыл.) үөрэнээччилэрэ.
Ирдэбилгэ эппиэттиир альбому оҥорбут бу 8 кылаас (бөлөх) отчуоттарын кылгатан, бүгүн «Эко-экспресс» анал сыһыарыытыгар (4 балаһанан) бэчээттиибит.
Кыайыылаах мугудайдар Дипломунан, наҕараадаламмыттар Грамотанан бэлиэтэниэхтэрэ. Бука бары кыттыбыттар сертификат ылаллар.
«Сосновый бор» лааҕырга сынньанар кэмҥит болдьоҕо барыгытыгар биир – алтынньы 19 күнүттэн сэтинньи 18 күнүгэр диэри.
Билсэр төлөпүөн: 8-914-222-35-79.