Күнтэн күн суолга массыыналар элбииллэрэ харахха быраҕыллар. Онно, биллэн турар, хомолтолоох түгэн элбиир. Оҕолор эмсэҕэлээбит быһылааннарын сүрүн төрүөттэрэ — түргэнник айаннааһын, суолу сатыы туорааччылары аһардыбат буолуу. Оскуола үөрэнээччилэригэр анаан “Оҕо дыбарыаһын” болуоссатыгар суолга сэрэхтээх буолууга үөрэтэр бэлисипиэт площадкатын арыйдылар. Тэрээһин сэрэтэр үлэни ыытыыга сүрүн болҕомтону туһаайар соруктаах.
Дьокуускайга бэлисипиэттээх оҕолорго анаан площадка арылынна. Икки көлүөһэлээҕинэн сылдьар киһи кэнники кэмҥэ биллэ элбээтэ. Салгыны буортулаабат, элбэх үбү-харчыны эрэйбэт уонна доруобуйаҕа туһалаах диэн дьон ордорор. Судургу эрээри, бу да тимир көлө буоллаҕа: суол быраабылатын тутуһууну син биир ирдиир.
Кимиэхэ да суох
Сулус Кудрин, 14 №-дээх оскуола III “А” кылааһын үөрэнээччитэ. Киһи сэргии көрөр бэлисипиэтин тэбэ сылдьар.
— Бу бэлисипиэти эһэм оҥорбута. Манан наар Ийэ болуоссатыгар хатааһылааччыбын. Аан бастаан, алта сааспар эдьиийим киэнигэр үөрэммитим. Бу бэлисипиэт хатааһылыырга наһаа табыгастаах. “Дрифтыыр” игин. Кэннитигэр баар “рычагынан” салайыахха сөп. Оҕолор интэриэһиргииллэр, хатааһылыахтарын баҕараллар. Маннык бэлисипиэт биһиэхэ эрэ баар.
Биһиги бу тэрээһиҥҥэ эрдэттэн бэлэмнэммиппит. Суол быраабылатын син билэбин. Манна кыра, дьиҥнээх суол курдук оҥорбуттара интэриэһинэй. Үөрэнэ таарыйа манна кэлэн хатааһылыам.
Эһэтэ Николай Михайлович Кудрин, конструирование учуутала. Онон, кини сатаабата диэн суох. Сиэннэрдээх киһи буолан ону-маны айан, үтүктэн оҥорон таһаарар.
-Мин биир атаҕым ыалдьар, оттон кэргэним бэлисипиэти үчүгэйдик сатаан тэппэт. Ол гынан баран наһаа хатааһылыахпытын баҕаран, икки бэлисипиэти холбуурга быһаарыммытым. Мантан киһи охтон түспэт. Кыра сиэммин ортобутугар олордон хатааһылыыбыт, оттон ыппыт ойоҕоспутугар сүүрэр. Суол устун буолбакка, болуоссаттарга, киэҥ сиргэ тэбээччибит. Уопсайынан икки бэлисипиэт оҥордум.
Оҕолор бэлисипиэккэ хатааһылыыр площадкаларын оҥорбуттара үчүгэй. Суолга тахсыбакка эрэ, манна оонньуу таарыйа үөрэниэхтэрэ буоллаҕа, — диир кини.
Айтал Саввинов, 26 №-дээх оскуола V “E” кылааһын туйгун үөрэнээччитэ. Тротуарынан айанныыр, суол быраабылатын билэр.
— Бүгүҥҥү тэрээһин бэркэ ааста. Дьиҥнээх суол курдук оҥорбуттара интэриэһинэй. Мин бэйэм бэлисипиэккэ 5 сааспыттан айанныыбын. Былырыын саҥа, улахан көлөну атыыласпыппыт. Онон дьэ, манна кэлэн хатааһылаан, боруобалаан, үөрэнэн аастым.
Оҕолор, суолга тахсыбакка эрэ, бэлисипиэти быраабыланнан тэбэргэ үөрэнэр сир баар буолбута олус үчүгэй! Бу түгэнии мүччү туппакка, баран оонньооҥ, үөрэниҥ, үөрүҥ-көтүҥ.
Ааптар: Айаана Третьякова