Аата: Женя СЛЕПЦОВ.
Төрөөбүт күнэ: 1996 сыл кулун тутар 20 күнэ.
Төрөөбүт сирэ: Абый улууһун Киэҥ Күөл бөһүөлэгэ.
Спорка сөбүлүүр көрүҥэ: сүүрүү уонна бокс.
Сөбүлүүр аһа: ийэтин бэрэскитэ уонна бүрээттэр “бууза” диэн астара.
Хантан? Абыйтан!
– Билигин эдэр киһи үксэ “Instagram” социальнай ситимҥэ олорор. Күннээҕи олохторун, тугу гыммыттарын, аһаабыттарын, ханна сылдьыбыттарын – барытын бар дьон көрүүтүгэр таһаараллар. Мин эмиэ инстаграмҥа хайдах киирэн, пранкер буолбуппун сырдатыым.
Инстаграмҥа хойутаан, бу сыл тохсунньутугар саҥа регистрацияламмытым. Тута наһаа сэҥээрбитим. Чахчыта даҕаны, аатырбыт сулустар бары манна, “инстаҕа”, олороллор эбит.
Абый улууһа сэттэ эрэ бөһүөлэктээх. Онно биһиги, киэҥ күөллэр, аан маҥнайгынан аныгылыы хип-хоп стиллээх үҥкүүнү туруорбуппут. Мин оччолорго “Шаг вперед” диэн киинэни көрөн: “Кинилэр курдук үҥкүүлүүр, ама, тоҕо сатаныа суоҕай?” – диэммин, хамаанда тэриммитим.
Оскуолаҕа үөрэнэр кэммэр, дьонум көрбөттөрүгэр, киинэ артыыстарын үтүктэ сатыырым. Холобура, “Час пик” киинэҕэ оонньуур Крис Такер диэн артыыс дьонтон кыбыстыбакка хамсанарын. Ол кэмтэн ыла артыыс буолар баҕа санаам үөскээбитэ. Ол гынан баран, оскуоланы бүтэриибэр санаам уларыйан хаалбыта. Үҥкүүнэн-ырыанан ырааппатым буолуо диэн, Мииринэйгэ гаас үөрэҕэр киирбитим. Доҕотторум: “Тоҕо култуураҕа барбатыҥ?” – дииллэрэ.
Үс сыл биллибэккэ ааһан, үөрэхпин бүтэрэн, Дьокуускайга ХИФУ ГРФ салаатыгар үрдэтинэ киирдим. Билигин 7/1 уопсайга олоробун. Хас күн аайы доҕотторбун кытта күлүүлээх видеолары устабыт.
Дьээбэ миэхэ чугас
“Пранк” диэн дьону дьээбэлииргин видеоҕа устан, Интернет ситимигэр таһаарыы буолар. Маннык көрүҥү Саха сиригэр бастакынан мин саҕалаатым. Бэйэм холобур оҥостор пранкердаахпын, ол киһибин инстаграмҥа
@jamiezhutv диэнинэн көрдөөн булбутум. Кини устубут видеоларын үтүктэн көрбүтүм. Аан бастакы пранкым – общественнай миэстэлэргэ сылдьан хаһыытаан, дьону соһутуу этэ. Бу пранкым элбэх киһи сэҥээриитин ылбыта. Инстаграм “Mambet_off” диэн бөлөҕөр таһаарбыттара. Ол онно тыһыынчанан дьон көрөн, миигин “mambet_off” диэн билэр буолбуттара. Бу бастакы устубут пранкпын @jamiezhutv суруйбуппар эппиэттээбитэ (ону 3-с хаартыскаҕа көр). Маннык дьээбэ, дьэ, миэхэ чугас эбит.
Үгүс киһи ыйытар: “Ити дьээбэлиир кыргыттарыҥ уоллаах эҥин буоллахтарына?” – диэн. Ону баара, мин бастаан хаадьылыахтаах кыыһым хараҕын, илиитин көрөн баран, биирдэ видеоҕа устабын ээ. Кэргэнэ, уол доҕоро суох 18-тан 21-гэр диэри саастаах кыргыттары хаба сатыыбын. Онтон үөһэ саастаах кыргыттар өйдөөмүөхтэрин сөп.
Уратыта
“Вайн” устарга киһи артыыстыыр маастарыстыбата, туттара-хаптара, оруолга киирэрэ суолталаах. Оттон “пранк” устар уратылаах. Мин, наһаа боччумнаахтык туттан, соҕотох хааман иһэн, күлбэккэ-үөрбэккэ даҕаны эмискэччи дьээбэлэнэбин. Ол иһин соһуйаллар, үөрэллэр. Доҕотторум- атастарым баар буоллахтарына, ханнык баҕарар уустук “пранкы” устуохпутун сөп. “Пранк” устарга киһи кыбыстар диэни олох умнан кэбиһиэхтээх. Бэйэ- ҕэр эрэллээх уонна дьону сирэйдэриттэн, харахтарыттан көрөн билэр психолог буолуоххун наада.
“To be continued”
Өссө “пранк” устарым таһынан “to be continued” («салгыытын кэтэһиҥ») диэн видеороликтары устан саҕалаатым. Биир сюжет маннык. Болуоссакка уулаах солууру тута сылдьабын. Ааһан иһэр дьоҥҥо ыһан иһэн, тохтоон хаалабын… Салгыыта биллибэт. Ити эмиэ сэҥээрдэр ньыма. Дьон бөҕө: “Салгыыта ханнаный? Ууну ыспытыҥ дуо?” – диэн ыйыппыт этэ. Суох буоллаҕа дии, кураанах этэ, ону баара.
“Wide Like”
Оскуолаҕа сылдьан үҥкүүнэн дьарыктаммытым билигин бэйэбэр эрэллээх сылдьарбар күүс-көмө буолар. Уопсайга бииргэ олорор уолаттарым Максим Нектягаев уонна Тимофей Слепцов буолан “Wide Like” бөлөҕү тэрийбиппит. Бөлөх буоларбыт быһыытынан, бары кыһыл өҥнөөх тэҥ ырбаахылаахпыт. Киһи хараҕар олус үчүгэйдик быраҕыллар. Дьэ, форма баар, баҕа баһаам. Уонна туохтан саҕалыыбыт? Итинник толкуйдуу сырыттахпытына, хата, оруобуна “Ритм города” диэн аахсыйа буолла. Бу тэрээһини рекламалыы таарыйа, видео устубуппут. Онтукабыт эмиэ остуоруйалаах. Устаары гыммыппыт, муусукабыт “провал”. Иһин түгэҕэр ыллыыр курдук кып-кыра колонкалаахпыт эрэ. Ол иһин “Мвидео” маҕаһыынтан көрдөстүбүт. “Уларсар көҥүллэммэт, атыылаһан ыллаххытына эрэ”, – диэтилэр. Санаабытын түһэрбэккэ, аллараа бастакы мэндиэмэҥҥэ баар төлөпүөн атыылыыр “Связной” маҕаһыынтан ыйыттыбыт. “Биһигини сырдатар буоллаххытына уларсабыт”, – диэбиттэригэр, үөрүү бөҕөтөбүт.
Видеобутун ТРК “Туймаада” иккис мэндиэмэнигэр баар аһыыр сиргэ уһулбуппут. Доҕотторбут остуоллары сыҕарытан кэбиспиттэрэ. Олорор дьон ытыс тыаһынан өйөөннөр, санаабытын көтөҕөннөр, бэркэ үҥкүүлээбиппит.
Инники былааным киэҥ, ону барытын инстаграмҥа @jeka_sleptsov страницабыттан билсиэххитин сөп. Өссө да “пранктар” тахса туруохтара диэн эрэннэрэбин. Солуута суоҕунан дьарыктанар, сиэрэ суох быһыыланар диэмэҥ. Маннык дьээбэлэр олоҕу киэргэтэллэр, көрүдьүөстээх түгэннэр үйэбитин уһаталлар. Күлэ-үөрэ сылдьыҥ!
Иннокентий ВЛАДИМИРОВ.