Мин Дьокуускай куорат 2 №-дээх оскуолатын IV «Б» кылааhыгар туйгуннук үөрэнэбин, ыстаарыстабын. Кылааспытыгар 33 үөрэнээччи баар. Учууталбыт Малина Михайловна Олесова. Бары олус иллээхпит, үөрэхпитигэр кыhаллабыт, үөрэх таhынан ыытыллар араас тэрээhиҥҥэ кыттабыт.
Маҥнайгы кылаастан «Муусука – барыбытыгар» диэн бырайыак чэрчитинэн экспериментальнай кылааска биһигини Антонина Афанасьевна Павлова үөрэтэр.
Муусуканы истэрин, ыллыырын сөбүлээбэт киhи бу аан дойдуга суоҕа буолуо. Ол көмөтүнэн саныыр санаабытын, ис турукпутун, тулабытыгар баар айылҕа кэрэ көстүүтүн тиэрдиэхпитин сөп.
Антонина Афанасьевна ыытар уруога олус сэргэх. Биһиги элбэх ырыаны үөрэтэбит, улуу композитордар олохторун, айымньыларын билсэбит. Ону таһынан кылааһынан муусукаалынай үнүстүрүмүөннэргэ оонньуубут: металлофон, блокфлейта, маракас, бубен, о.д.а.
Кылааспытыгар хуорунан ыллыыбыт уонна бэйэбит доҕуһуоллуубут. Куорат иһинэн ыытыллар куонкурустарга мэлдьи кыттабыт. Маҥнайгы кылааһы бүтэрэн бараммыт, үһүө буолан «Сосновый бор» кииҥҥэ «Муусука – барыбытыгар» бырайыак иһинэн дьарыктанар өрөспүүбүлүкэ араас улуустарыттан мустубут оҕолору кытта сынньаммыппыт, элбэххэ үөрэммиппит, сайдыбыппыт.
Мин блокфлейтаны олус сөбүлээбитим. Ол иһин 2 №-дээх искусство оскуолатыгар флейта кылааһыгар туттарсан киирбитим. Билигин IV кылааска үөрэнэбин. 2016 с. «Весенние фанфары» диэн регионнааҕы куонкуруска I степеннээх лауреат, 2017 с. өрөспүүбүлүкэтээҕи куонкуруска I степеннээх дипломант буолбутум. Бу ситиһиилэрбэр «Муусука – барыбытыгар» бырайыак элбэҕи көмөлөстө.
Учууталбар Антонина Афанасьевнаҕа махталбын тириэрдэбин.
Оҕолоор, эһиги эмиэ муусуканы таптааҥ, истиҥ, элбэхтик ыллааҥ!
Влада АФАНАСЬЕВА,
2 №-дээх оскуола.
Дьокуускай.