Мэҥэ Хаҥалас улууһун Мэлдьэхси орто оскуолата тэрийэн, «Куйуур-2022» тэрээһин буолан ааста.
Манна оскуолабыт VI-VIII кылааһын уолаттара уонна Ф.Г.Охлопков аатынан Майа орто оскуолатын оҕолоро көхтөөх кыттыыны ыллылар.
Куйуурга, уопсайа, 20-чэ оҕо биэс хамаандаҕа арахсан күрэхтэстилэр. Күрэх алта түһүмэхтэн турар. Ол курдук, ойбон алларыы, чэйи оргутуу, сүүрүү, сыал ытыы, автомат ыһыы-хомуйуу, хомуур хапсаҕай. Оҕолор салгыҥҥа оонньоон, сынньанан астыннылар.
Ф.Г.Охлопков аатынан Майа орто оскуолатын VII кылааһын үөрэнээччилэриттэн санааларын ыйыттыбыт.
Ярик Скрыбыкин: «Куйуурга аан бастаан сырыттым. Элбэх оҕону кытта билистим.Үчүгэй баҕайы тэрээһин буолла. Хомуур хапсаҕайы сөбүлээтим».
Тимур Барашков: «Оҕолору кытта билсиһэн кэпсэтэн, үөрэн-көтөн, оонньоон-көрүүлээн, күммүтүн үчүгэй баҕайытык атаардыбыт. Мэлдьэхси орто оскуолатыгар махталбытын тиэрдэбит».
Бу курдук, оҕолор иллэҥ кэмнэрин туһалаахтык атаардылар. Инникитин маннык тэрээһиннэр буола турдуннар диэн баҕа санаабытын тиэрдэбит.
Ксения Игнатьева, X кылаас, «Үктэл» эдкорпост.
Мэҥэ Хаҥалас.