От ыйыгар кохлеарнай импланнаах оҕолордоох уон дьиэ кэргэн «Мин истэбин-мин сатыыбын» диэн бырайыагынан өрүһүнэн устууга кытынна. Бу устуу «Харысхал» уонна Президент гранын пуондаларын өйөбүлүнэн ааста.
Президент гранын пуондатын уонна «Харысхал» аһымал пуонда өйөбүллэринэн үлэлиир «Тыас-уус эйгэтигэр хардыы» мөлтөхтүк истэр оҕолоох төрөппүттэр түмсүүлэрэ бу дьыл от ыйын ортото «Мин истэбин-мин сатыыбын» диэн доруобуйаны тупсарар өрүһүнэн устууну тэрийдэ. Бырайыак «Шаг в мир звуков» тэрилтэ уонна «ИнЯкутия» туристическай оператор көмөтүнэн 2017 сыллаахтан үлэлиир. Түмсүү бэрэссэдээтэлэ Юлия Устинова этэринэн, дьиэ кэргэн сынньалаҥар уунан устуу ордук барсар.
«Устуу кэмигэр оҕо ууга харбаан, доруобуйатын бөҕөргөтүөн сөп. Бэлэмнэнии сыл аҥарын инниттэн саҕаламмыта. Сайаапка хомуйбуппут, наадалаах мал испииһэгин оҥорбуппут. Туризм инбэлиит оҕо уопсастыбаны кытта сибээһин күүһүрдэр, дьиэ кэргэни түмэр. Бэйэ-бэйэлэрин кытта үчүгэйдик билсэллэр, санааларын үллэстэллэр уонна кыһалҕаларын быһаарсаллар», — диэтэ Юлия Устинова.
Устуу маршрута Амма улууһунан ыытыллыбыта туспа суолталаах. Улуус баай историята, кэрэ айылҕата оҕолору, улахан дьону кэрэхсэттэ. Айан устатыгар көхтөөх киэһэлэр, лекциялар, спортивнай оонньуулар, Амма улууһугар аналлаах квест ыытыллан, оҕолор «Харысхал» аһымал пуондаттан бэлэхтэри туттулар.