Сахалартан бастакы академик XXIV өрөспүүбүлүкэтээҕи научнай «Инникигэ хардыы – Professor V.P. Larionov «A Step into the Future» Science Fair» кэмпириэнсийэ үлэтин саҕалаата. Дьокуускай куорат “Триумф” спорт комплексыгар Саха сирин бары муннугуттан 1298 саамай бастыҥ эдэр чинчийээччи мустан, экспертэр иннилэригэр бэйэлэрин үлэлэрин көмүскээтилэр.
«Инникигэ хардыы – Professor V.P. Larionov «A Step into the Future» Science Fair» кэмпириэнсийэни СӨ үөрэххэ уонна наукаҕа миниистирэ Владимир Егоров үөрүүлээх быһыыга-майгыга аста. Кини оҕолорго туһаайан, Саха сиригэр наука сайдыытыгар улахан кылааттарын киллэрбит үтүөлээх учуонайдар ааттарын ааттаан туран, кинилэр бу кэмпириэнсийэ олохтонуутугар улахан сабыдыаллаахтарын санатта. Олортон биирдэстэринэн сахалартан бастакы академик Владимир Ларионов буолар. Кини аата Н.Э.Бауман аатынан Москватааҕы Государственнай Техническай университет албан аатын галереятыгар көмүс буукубанан суруллан турар. Миниистир эттэ:
— Саха өрөспүүбүлүкэтэ үөрэҕирии инники кэккэтигэр тахсарын туһугар биһиги аан дойдутааҕы үөрэҕирии эйгэтигэр кимэн киириэхтээхпит, аан дойду таһымыгар тахсыахтаахпыт. Ол туһугар биһиги саҥа объектары тутабыт, инновационнай бырайыактары киллэрэбит, 40 тахса омук дойдулара кыттыылаах норуоттар икки ардыларынааҕы “Туймаада” олимпиаданы, эдэр чинчийээччилэр Азиатскай-Тихоокеанскай кэмпириэнсийэлэрин, норуоттар икки ардыларынааҕы интеллектуальнай оонньууну тэрийэн ыытабыт. Онон Саха сирэ Россия үөрэҕириитигэр инники күөҥҥэ тахсарыгар төрүөт, олук баар. Кэмпириэнсийэҕэ кыттан ылбыт билиигит, сатабылгыт инники олоххутугар, үөрэххитигэр туһалыаҕа, талан ылбыт идэҕитигэр профессионал буоларгытыгар улахан оруоллаах буолуоҕа диэн эрэнэбин. Кэмпириэнсийэ кыттыылаахтара ,дойду инникитин түстүүр дьон буолалларыгар баҕарабын.
“Инникигэ хардыы” кыттааччыларын Россия наукатын Академиятын член-кэрэспэдьиэнэ, профессор Никита Соломонов, СӨ наукатын Академиятын вице-президенэ Андрей Матвеев, СӨ “Целевой фонд будущих поколений” генеральнай дириэктэрин солбуйааччы Наталья Оленова, ХИФУ проректора Михаил Федоров, ЯНЦ СО РАН учуонай-сэкирэтээрэ Петр Мордовской уо.д.а. эҕэрдэлээтилэр.
- Өрөспүүбүлүкэ үрдүнэн муниципальнай таһымҥа “Инникигэ хардыы” кэмпириэнсийэҕэ 10 000 тахса оҕо кыттыыны ылла.
- Өрөспүүбүлүкэтээҕи таһымҥа Дьокуускайга 34 улуустан, үөрэх 346 кыһатыттан 1298 үөрэнээччи кытта кэллэ.
- Сыл ахсын саҥа хайысха эбиллэн, быйыл 12 секция уонна 35 подсекция үлэлээтэ.
- Бастакы күн кыттааччылар 1143 улэни нуучча уонна ангылычаан тылынан кемүскээтилэр.
- 500 эксперт, учуонай, учуутал, научнай салайааччы оҕолор үлэлэрин салайдылар, сыаналаатылар.
- Сүрүн тэрийээччилэринэн буолаллар: СӨ үөрэҕин уонна наукатын министиэристибэтэ, СӨ наукатын дьоҕус Академията, М.К.Аммосов аатынан Хотугулуу-Илиҥҥи федеральнай университет, СӨ наукатын Академиятын институттара, ФИЦ «Якутский научный центр СО РАН», ГАНОУ РС(Я) РРЦ «Юные Якутяне», «Россия — моя история» история паарката.
- Спонсордар: СӨ “Целевой фонд будущих поколений”, “Сбербанк” Саха сиринээҕи салаата, ООО “Майтона”, “Синет” компаниялар бөлөхтөрө.
Сыл ахсын өрөспүүбүлүкэ кэмпириэнсийэтин 200-тэн тахса кыайыылаахтара уонна призердара россиятааҕы, аан дойдутааҕы таһымнаах научнай кэмпириэнсийэлэргэ кыттыыны ылаллар.
Быйылгы, 24-с төгүлүн ыытыллар «Инникигэ хардыы – Professor V.P. Larionov «A Step into the Future» Science Fair» кэмпириэнсийэ 3 күннээх үлэтин түмүгүнэн талыллыахтаах бастыҥ эдэр чинчийээччилэр Саха сирин хамаандатын састаабыгар киирэн, россиятааҕы, аан дойдутааҕы таһымнаах научнай кэмпириэнсийэлэргэ кыттан, Саха сирин чиэһин көмүскүөхтэрэ.
Источник: keskil14.ru
.