Күн бүгүн урукку «Бэлэм буолбут», ол аата билиҥҥи “Кэскилбит” 82 сааһын бэлиэтиир үөрүүтүн үллэстэбит. Бэлиэтиибит, ол аата ахтан-санаан ааһабыт бииргэ үлэлээбит, билигин сынньалаҥҥа олорор сорох үлэһиттэрбитин, араас сылларга алтыспыт ааптардарбытын, дьоруойдарбытын, көрүдьүөс командировкалары, тэрээһин үлэбитин.
Букатын соторутааҕыта, муус устарга Бүлүү улууһугар Чернышевскай оскуолатыгар сүлүөттүү баран кэлбиппит. Ол туоһута – Дьөккөн Герой Н.А. Кондаков аатынан орто оскуолатын кэлэктиибэ эһиэхэ, учууталларгытыгар, төрөппүттэргитигэр туһаайбыт ыҥырыылара.
ЫҤЫРЫЫ СУРУК
Ийэ тылынан ааҕар-суруйар аҕа саастаах көлүөнэ: учууталлар, төрөппүттэр, салайааччылар, эбэлэр-эһэлэр! Бука бары бэйэбит хаһыаты-сурунаалы, кинигэни-айымньыны астына ааҕар үтүө үөрүйэхпитин үүнэр ыччакка иҥэрэр уонна хаалларар туһугар бүүс-бүтүннүү турунуоҕуҥ диэн эһигини ыҥырабыт.
Дьокуускайтан Бүлүүгэ тиийэр аартыкка кэккэлэһэр нэһилиэктэрбит оскуолалара бука бары дойдубут чулуулара, саха саарыннарын ааттарын үйэтитэллэрин кэрэһилээн, айаннаан иһэр ыалдьыты сирдииллэр. Оттон ити кыһалар ыччаттара ханнаҕытый? Дойдуга, өрөспүүбүлүкэҕэ, улууска үөрэҕи сахпыт түҥ былыргы историябыт кэрэһитэ буолан, Бүлүү куоракка диэри тиэрдэллэр Баппаҕаайы М.А. Алексеев аатынан, Лөкөчөөн А.И. Леонтьев аатынан, Дьөккөн Н.А. Кондаков аатынан, Хампа С.Ф. Гоголев аатынан, Тааһаҕар Н.Н. Каратаев аатынан, Чернышевскай С.М. Васильев аатынан орто оскуолалара, Өкүндү В.П. Трофимова аатынан ситэтэ суох орто оскуолата, Тоҕус Е.А. Степанова аатынан гуманитарнай-эстетическэй гимназията. Маны таһынан Бүлүү куоратыгар ситиһиилээхтик оҕо аймаҕы үөрэтэллэр Н.И. Протопопова аатынан «Кэскил» оҕо киинэ, Бүлүүтээҕи Г.И. Чиряев аатынан 1 №-дээх оскуола, Бүлүүтээҕи Г.С. Донской аатынан 2 №-дээх оскуола, Бүлүүтээҕи Н.С. Степанов аатынан 3 №-дээх оскуола, И.Л. Кондаков аатынан улуустааҕы гимназия, Бүлүүтээҕи Н.Г. Чернышевскай аатынан педагогическай кэллиэс, Чочу И.М. Гоголев аатынан орто оскуолата, Кыадаҥда К.С. Чиряев аатынан оскуолата. Бүлүү эбэни туораатахха, Халбаакы П.И. Быканов аатынан орто оскуолата, Мастаах А.А. Миронов аатынан орто оскуолата, Кыргыдай Д.А. Гуляев аатынан орто оскуолата, Тылгыны И.Н. Ханды аатынан орто оскуолата, I Күүлэт П.А.Павлов аатынан орто оскуолата, II Күүлэт Н.А. Алексеев аатынан орто оскуолата.
Эһиэхэ барыгытыгар туһаайабыт: суруга-бичигэ, тыла-саҥата суох норуот сайдыы таһымын ылбат. Оччотугар бүгүҥҥү үөрэнээччилэрбитин ырааҕы анаарарга иитиэҕиҥ. Арассыыйа хотугулуу-илиҥҥи өттүгэр оҕоҕо анаммыт 82 саастаах суос-соҕотох “Кэскил” хаһыаппытыгар 51 сыл устата кылаабынай эрэдээктэрдээбит Бүлүү сирин чулуу кыыһа, саха суруналыыстыкатын Далбар Хотуна Н.И. Протопопова аатын ытыгылаан, үөрэнээччилэргэ ананар бастыҥ билиини сомсор алгыстаах албаһы мүччү тутумуоҕуҥ, кини иилээбит “Кэскил”, “Юность Севера” хаһыаттарыгар сайдар кэскиллээх оҕолорбутун суруйтарарга турунуоҕуҥ!
Бүлүүлүүр аартык тыргылларын тухары тайаабыт Үөһээ Бүлүү, Ньурба, Сунтаар Саарыннарын ааттарын үйэтитэр үөрэх кыһаларын эмиэ ыҥырабыт!
Итиэннэ 2018 сыл иккис аҥаарыгар суруйтаран баран, кэлэр сыллааҕы сурутуу хампаанньатыгар, балаҕан ыйыттан Саха саарыннарын ааттарынан оскуолалар икки ардыларыгар өрөспүүбүлүкэтээҕи күрэҕи «Кэскил», «Юность Севера» хаһыаттар эрэдээксийэтин кытта кыттыһан биллэрэбит!
Дьөккөн Советскай Союз Геройа Н.А. Кондаков аатынан орто оскуолатын аатыттан
эбии үөрэхтээһин педагога, РФ үөрэҕириитин туйгуна,
СӨ норуотун хаһаайыстыбатын үтүөлээх үлэһитэ
Альбина Ионовна ИОНОВА.
Муус устар 20 күнэ.