Күндүтүк саныыр «кэскиллэрбин» хаhыат төрөөбүт (төрүттэммит) күнүнэн эҕэрдэлиибин!
Билиҥҥи оҕолорго холоотоххо, биһиги оҕо сааспыт хаһыат кыбыныылаах, марка килиэйдээһиннээх, переменаҕа почтаҕа сүүрээһиннээх этэ. Ол кэмҥэ бастыҥ оҕолор, уһулуччу талааннаахтар бары «Кэскилгэ» кэккэлэһэллэрэ. Биһиги да сылын ахсын ыстатыйа дьоруойа буолан дьоммутун үөрдүбүттээхпит. Халыҥ папка буолан тиһиллибит архыыбым оҕо сааһым үтүө өйдөбүнньүгэ. Оннук сыыйа оҕо саастан ыччат суолугар үктэммиппит. Онтон мин бэчээт дьиэтиттэн арахсыбат этим. Ыстатыйабын таһабын, арыт доҕотторбун көрсөбүн, тэрээһиннэргэ кыттабын.
Олус кыhамньылаах уонна сэргэх ыччаттарга ураты сыhыаннаах Нина Иннокентьевна Протопопова миигин болҕомтоҕо ылан элбэхтэ үөрдүбүтэ. Чугастык сыһыаннаһыым уонна алтыһыым оҕо общественнай тэрилтэтигэр үлэлиир кэммиттэн саҕаламмыта. «Кэскил», «Юность Севера» эн хаhыаттарыҥ диирэ. Урут пионерия эрдэҕинэ оҕо хаһыаттара уонна оҕо тэрилтэлэрэ биир уорган этилэр. Дьоҥҥун кытта (редакция үлэһиттэрин этэр) куруук бииргэ буол диэн баҕа санаатын биллэрэрэ. Кэлин 2013 сыллаахха Нина Иннокентьевна, Татьяна Михайловна Ильина уонна мин буолан президент Е.А.Борисовка мунньах тэрийэн, туспа оҕо бэчээтин кыһатын тэриттэрбиппит. Издательство бастаан утаа атаҕар турарыгар бастакы дириэктэр А.П.Гоголевтыын улахан үлэни ыыппыппыт.
Издательство үлэһиттэрин кытта күннэтэ алтыһар буолан чугасыһан хаалбыппыт. Ити кэмтэн ыла хаһыакка элбэх балаһаны суруйбут, бэлэмнэспит буолуохтаахпын. Доҕорбут, хаhыат кылаабынай эрэдээктэрин солбуйааччы А.М.Иевлева көҕүлээһининэн сахалыы, нууччалыы оҕо общественнай тэрилтэлэрин анал балаһалара олохтоммуттара. Ол үтүө дьаһал билигин да салҕанан бара турарыттан киһи үөрэр.
Доҕордоһуубут салҕанар… Кэм аастаҕын аайы олох хаамыытын батыһа хаһыаппыт тупсар, сэргэхсийэр, саҥалыы тыыннанар. Билиҥҥи коллективка, саҥа дириэктэр Ольга Ивановна Семеноваҕа ситиһиилэри, сонун дьаһаллары баҕарабыт. Хаһыаппыт, оҕо саас аргыһа – өрөспүүбүлүкэ оҕотун бүттүүнүн кутун туттун диэн баҕа санаабын тиэрдэбин!
Саха Өрөспүүбүлүкэтин оҕолорун
общественнай холбоһуктарын сойууһун
бэрэссэдээтэлэ, Российскай Федерация
суруналыыстарын сойууhун чилиэнэ