Оҕолору үтүөҕэ, кэрэҕэ, сырдыкка такайарга эбии үөрэхтээһин оруола улахан. Быйылгы үөрэх дьылыттан Павловскай орто оскуолатыгар “Творческая мастерская” диэн куруһуок үлэтин саҕалаабыта. Салайааччы – Попова Эльвира Васильевна.
Бу сыл устата элбэх саҥаҕа үөрэннибит. Онтон биирдэстэрэ – флуид арт техника буолар.
Бу ньыма олус судургу. Манна хайаан да уруһуйдуур дьоҕурдаах буолар наадата суох. Ким баҕарар бэйэтэ баҕарбыт өҥүнэн олус интэриэһинэй, ураты, киһи болҕомтотун тардар хартыынатын айан таһаарыан сөп.
Маннык хартыынаны оҥорорго акрил кырааска, биирдэ туттуллар ыстакаан, холуста, киистэ, тирээпкэ уонна уу наада буолар. Бастатан туран, үстэн биэскэ тиийэ араас өҥнөөх кырааскалары талан, ыстакааҥҥа кыра ууну кытта булкуйабыт (блины тиэстэтин курдук убаҕас буолуохтаах). Онтон ол бэлэмнээбит кырааскабытын холустаҕа кутабыт. Кутан баран хамсатабыт, утах иһэр туруупка нөҥүө үрэбит. Килэбэчигэс блестканы таммалатан киэргэтиэххэ сөп. Куурбутун кэннэ лаахтаан, араамалаан сиэрин ситэрэбит.
Бу уруһуй саҥа аныгылыы ньымата буолар. Дьиэ, оскуола интерьерын киэргэтэр олус кэрэ хартыыналар тахсаллар.
Ааптар: Аина Охлопкова, Х кылаас.
Мэҥэ Хаҥалас.