Биһиги, Дьокуускай куорат 12-ис №-дээх оскуолатын оҕолоро, ыам ыйын 5 күнүгэр Табаҕа тумуһугар сыл аайы үгэскэ кубулуйбут «Ньургуһуннуун сиэттиһэн» диэн тэрээһиҥҥэ туруммуппут. Ол айаммытыгар сыл аайы сатыы 5 килэмиэтири тыа быыһынан хаамабыт, иккитэ хайаны дабайабыт.
Миэстэбитигэр тиийэн кыратык чэйдии түһэн баран, аа- дьуо күрэхпитин саҕалаабыппыт. Оҕолор уонна төрөппүттэр — бары наһаа үчүгэйдик бэлэмнэммиттэр, хоһооннорун-ырыаларын үөрэппиттэр, тылбааска холоммуттар.
Быйылгы дьүүллүүр сүбэ үс киһиттэн састааптааҕа. Күрэхпит уопсайа үс түһүмэхтээх этэ. Бастакы түһүмэххэ хорсун-хоодуот сибэкки, ньургуһун туһунан хоһоону уус-ураннык ааҕыы этэ. Онно кылаастан биир кыыс, биир уол, биир төрөппүт кыттыахтаахтара, кинилэргэ барыларыгар балаһыанньанан биир уопсай сыана туруохтааҕа.сМанна 1 миэстэни – 9-с, 2-һи — 10-с, 3-һү 7-с кылаастар ылбыттара. Күрэхпит иккис түһүмэҕэр эрдэ дьиэҕэ бэриллибит сорудах быһыытынан ньургуһун туһунан сахалыы хоһоону нууччалыы уонна английскайдыы тылбаастааһын түмүгүнэн 1-кы миэстэҕэ 10 кылаас үөрэнээччитэ Солдатова Алина, 2-скэ — 11 кылаас үөрэнээччитэ Горохов Айнари, 3-скэ 6 кылаас үөрэнээччитэ Архипова Даша тахсыбыттара.
Түһүмэхтэр быыстарыгар төрөппүттэр бэйэлэрэ туруорбут кэрэ-нарын ньургуһун туһунан үҥкүүлэрин бэлэхтээбиттэрэ. Үһүс түһүмэххэ кылааһынан ньургуһун туһунан ырыаны ыллааһыҥҥа күрэхтэспиппит. Ырыабытын ыалдьыппыт Марат Ефимович баяҥҥа доҕуһуоллаабыта. Манна 1 миэстэҕэ 6 кылаас, 2-скэ 8 кылаас,3-скэ 11 кылаас тахсыбыттара. Ким ыллыыр, ким оонньуур, ким хаартыскаҕа түһэр — барыта олус үчүгэй этэ.
Сыллата маннык тэрээһитэн кэрэ сибэкки туһунан үгүһү билэбит, дуоһуйа сынньанабыт.
Семенова Сандаара , Дьокуускай куорат 12-ис №-дээх оскуолатын 8 «б» кылааһын үөрэнээччитэ, «Айылгы» юнкорпост