Балаҕан ыйын 1 күнүгэр Арктика норуоттар икки ардыларынааҕы оскуолата аанын тэлэччи аста. Оскуола дириэктэрэ, Россия уопсай үөрэхтээһинин Бочуоттаах үлэһитэ, СӨ үтүөлээх учуутала С.С.Татаринова оскуолатын көрдөрдө: бассейн, спортсаала, планетарий, хореографическай саала, остолобуой, кэрэхсэбиллээх фойелар, медиакиин, хааччыллыылаах, үөрэнэргэ туһалаах тээбириннэринэн, малынан-салынан толору кылаастар.
… Холобур, технология кэбиниэтигэр аналлаах тиэхиньикэни сэргэ, космическай хараабыл макыата бэлиэ сиргэ турар. Бу—учуутал Е.И.Малышев Бүлүүтээҕи иитиллээччилэриниин оҥорбут оҥоһуктара. Теннис мээчиктэрин, глобуһу, таҥас баайар испииссэни туһанан оҥорбуттар.
—Оскуолабытыгар 800 сайабылыанньа киирбититтэн, 185 үөрэнээччи анал тургутуктары ааһан киирдилэр. Учууталлар эмиэ ирдэбиллээх сүмэрдээһини бардылар. Инникитин омук оҕолорун ыҥыран үөрэтиэхпитин, кампуспутун кэҥэтиэхпитин баҕарабыт,—диир дириэктэр Сардаана Татаринова.
Диана Назарова, VII “Г” кылаас үөрэнээччитэ:
—Бу оскуолаҕа ангылычаан тылын дириҥэтэн үөрэтэллэр, ол иһин олус талаһан, туттарсан киирдим. Урут Дьокуускай 2 №-дээх оскуолатыгар үөрэммитим. Манна эбии кытай тылын үөрэтэр буоллум. Сабыс-саҥа оскуолабын олус сөбүлээтим.
Леня Петров, Күндүл Михайлов, VII “А” кылаас үөрэнээччилэрэ:
—Биһиги ангылычаан тылын дириҥник үөрэтэр кылааска түбэстибит. Ньиэмэс уонна француз тылларын үөрэтиэхпит. Манна наһаа үчүгэй, киэҥ-куоҥ. Киһи хаһан баҕарда эрэ сынньанан олорор түһэр сирдээх. Оскуолабыт аныгылыы тутуулаах, сырдык, ыраас.
Оля Иванова, Х кылаас үөрэнээччитэ:
— Биһиги дьиэ кэргэнинэн Москваҕа олоро сылдьыбыппыт. Онно нуучча-кэриэй оскуолатыгар үөрэнэн, кыһыл аттестаттаах бүтэрэн, бу оскуола Х кылааһыгар эксээмэн бөҕөнү туттаран киирдим. Мин өссө СУНЦ-ка баалым хабыста эрээри, саҥа аһыллыбыт оскуоланы таллым. Бастатан туран, дьиэтэ улахан, учууталлара бастыҥнар, үөрэнээччилэрэ эйэҕэстэр, сайаҕастар. Бу оскуола сүрүн уратыта—манна тустаах, талбыт предметтэргин нууччалыы, ангылычаанныы үөрэтэҕин. Балаҕан ыйын 1 күнүгэр оскуолабыт үөрүүлээх аһыллыытын сиэригэр-туомугар СӨ Ил Дархана Айсен Николаев ыалдьыттаабыта. Сөбүлүүр уруоктарым биология, химия, ангылычаан тыла. Инникитин пластическай хирургияны кытта ситимнээх үөрэххэ туттарсыахпын, медицинаҕа идэтийиэхпин баҕарабын.
Бу күн Саха сиригэр сонун оскуола аһыллыбытынан АХШ-тан, Швецияттан, Финляндияттан, Норвегияттан, Исландияттан, Соҕуруу Кэриэйэттэн, Канадаттан, Польшаттан, Чехияттан, Кытайтан, Япониятан, Францияттан араас омук дьоно бэйэлэрин эҕэрдэлэрин видеонан ыыппыттар.
Ааптар: Жанна Леонтьева